ایذن وئر توی گئجه سی من ده سنه دایه گلیم
ال قاتاندا سنه مشاطه تماشایا گلیم.
سن بو آیلی گئجه ده سئیره چیخان بیر سرو اول.
ایذن وئر من ده دالینجا سورونوب سایه گلیم.
منه ده باخدین او شهلا گوزوله ، من قارگون،
جورئتیم اولمادی بیر کلمه تمنایه گلیم.
من جهنم ده ده باش یاسدیقا قویسام سنیله ،
هئچ آییلمام کی دوروب جنت مأوایا گلیم.
ننه قارنیندا سنله ائگیز اولسایدیم اگر.
ایسته مزدیم دوغولوب بیرده بو دونیایا گلیم.
سن یاتیب جنتی رویادا گورنده گئجه لر،
من ده جنتده قوش اوللام ، کی او رویایا گلیم.
قیتیلیغ ایللر یاغیشی تک قورویوب گوز یاشیمیز،
کوی عشقینده گرک بیرده مصلایه گلیم.
سنده صحرایه ماراللار کیمی بیر چیخ نولوکی ـ
منده بیر صئیده چیخانلار کیمی صحرایه گلیم.
آللاهیندان سن قورخماییب اولسان ترسا،
قورخورام منده دونوب دین مسیحایه گلیم.
شیخ صنعان کیمی دونقوز اوتاریب ایللرجه،
سنی بیر گورمک اوچون معبد ترسایه گلیم.
یوخ صنم ! آنلامادیم ، آنلامادیم ، حاشا من ،
بوراخیب مسجدیمی ، سنله کلیسایه گلیم!
گل چیخاق طور تجلایه ، سن اول جلوهٔی طور،
من ده موسا کیمی اول طوره تجلایه گلیم.
شیردیر شهریارین شعری الینده شمشیر،
کیم ، دئیر من بئله بیر شیریله دعوایه گلیم ؟
۱۳۵۳